पारदर्शक कारभाराला गती; सचिन धात्रक यांच्या कार्यपद्धतीने ठेकेदारांमध्ये धडकी

 

कुणाल शेलार/मुरबाड : सार्वजनिक बांधकाम विभागाच्या माध्यमातून नागरिकांना मूलभूत सुविधा उपलब्ध करून देताना रस्ते,पूल,शासकीय इमारती तसेच इतर सार्वजनिक मालमत्तांची निर्मिती आणि देखभाल केली जाते.त्यामुळे या कामांमध्ये गुणवत्ता, पारदर्शकता आणि वेळेचे नियोजन यांना विशेष महत्त्व असते.ठाणे जिल्हा सार्वजनिक बांधकाम विभागाचा पदभार सचिन धात्रक यांनी स्वीकारल्यानंतर या बाबींना अधिक गती मिळाल्याचे चित्र निर्माण झाले आहे.त्यांच्या कार्यपद्धतीमुळे सार्वजनिक बांधकामांच्या गुणवत्तेकडे आणि कामांच्या प्रत्यक्ष पाहणीकडे विशेष लक्ष दिले जात असल्याचे बोलले जात आहे.सचिन धात्रक यांनी पदभार स्वीकारल्यापासून‘काम कागदावर नव्हे, तर प्रत्यक्ष गुणवत्तेचे दिसले पाहिजे’या भूमिकेला प्राधान्य दिल्याचे दिसून येते. कामाच्या गुणवत्तेबाबत कोणतीही तडजोड न करता नियम आणि तांत्रिक निकषांचे पालन व्हावे,यासाठी त्यांनी अधिकारी आणि संबंधित यंत्रणेला स्पष्ट भूमिका घेतल्याची चर्चा आहे.विशेषतःनिकृष्ट दर्जाचे काम करणाऱ्या ठेकेदारांवर कारवाई करण्याची भूमिका घेतल्यामुळे सार्वजनिक बांधकाम क्षेत्रात जबाबदारीचे वातावरण निर्माण होण्याची अपेक्षा व्यक्त होत आहे.निविदेतील अटी,मंजूर अंदाजपत्रक,तांत्रिक निकष आणि कामाची गुणवत्ता यांचे काटेकोर पालन झाले पाहिजे,यावर भर दिला जात असल्याचे सांगितले जाते.त्यामुळे सार्वजनिक निधीतून होणाऱ्या प्रत्येक कामाचा दर्जा चांगला राहावा,ही अपेक्षा अधिक बळकट झाली आहे.

कधीही तडजोड नाही,कधीही माघार नाही,हीच कार्यपद्धती सचिन धात्रक यांच्या भूमिकेची ओळख ठरत असल्याचे बोलले जाते.कामाच्या बाबतीत कोणाच्याही दबावाला बळी न पडता नियम आणि गुणवत्तेला प्राधान्य देणे,ही त्यांची भूमिका असल्याचे त्यांच्या कामकाजातून जाणवत असल्याची चर्चा आहे.वरिष्ठ अधिकारी,लोकप्रतिनिधी किंवा इतर कोणत्याही स्तरावर निर्णय घेताना सार्वजनिक हित आणि शासकीय नियम यांनाच सर्वोच्च स्थान असावे,अशी त्यांची भूमिका असल्याचे मानले जाते.पदभार स्वीकारल्यानंतर सचिन धात्रक यांनी ठाणे जिल्ह्यातील विविध भागांना भेटी देऊन सुरू असलेल्या सार्वजनिक बांधकामांचा आढावा घेण्यास सुरुवात केली.मुरबाड तालुक्यातील संगम येथे सुरू असलेल्या कामाची त्यांनी आमदार किसन कथोरे तसेच संबंधित अधिकारी यांच्या उपस्थितीत पाहणी करून कामाचा आढावा घेतला.प्रत्यक्ष ठिकाणी जाऊन कामाची प्रगती,गुणवत्ता आणि आवश्यक बाबींची पाहणी करण्याच्या या पद्धतीमुळे अधिकाऱ्यांमध्येही जबाबदारीची जाणीव वाढत असल्याचे बोलले जात आहे.सार्वजनिक बांधकामाच्या प्रत्येक कामामागे नागरिकांचा पैसा असतो.त्यामुळे त्या निधीचा योग्य वापर होणे आणि त्यातून दर्जेदार काम उभे राहणे ही प्रशासनाची प्राथमिक जबाबदारी आहे.याच दृष्टिकोनातून पारदर्शकता,शिस्त आणि गुणवत्तेला प्राधान्य देणारी कार्यपद्धती राबविण्याचा प्रयत्न होत असल्याचे चित्र आहे.दरम्यान,कोणावरही आरोप-प्रत्यारोप करणे सोपे असले तरी कोणताही आरोप करताना त्याला ठोस पुराव्याची जोड असणे आवश्यक आहे. त्यामुळे निराधार आरोपांकडे लक्ष न देता प्रत्यक्ष केलेल्या कामातून आपली भूमिका स्पष्ट करणे,हीच अधिक परिणामकारक पद्धत असल्याचे सचिन धात्रक यांच्या कार्यशैलीतून दिसून येत असल्याची चर्चा आहे.ठाणे जिल्ह्यात वाढती लोकसंख्या,वाहतूक व्यवस्था,रस्ते,पूल आणि सार्वजनिक सुविधांची वाढती गरज लक्षात घेता सार्वजनिक बांधकाम विभागाची जबाबदारी मोठी आहे.अशा परिस्थितीत गुणवत्ता,पारदर्शकता आणि उत्तरदायित्वाचा त्रिसूत्री कारभार प्रभावीपणे राबविला गेल्यास जिल्ह्यातील विकासकामांना निश्चितच गती मिळू शकते.सचिन धात्रक यांच्या कार्यपद्धतीकडून नागरिकांच्या अपेक्षा वाढल्या असून,आगामी काळात या भूमिकेचा ठाणे जिल्ह्यातील सार्वजनिक बांधकामांवर सकारात्मक परिणाम दिसून येईल,अशी अपेक्षा व्यक्त होत आहे.