शेतकऱ्याच्या सुपुत्राने घडविले हजारो 'ब्लॅक बेल्ट' योद्धे; कराटे प्रशिक्षक वसंत जमदरे यांचा मुरबाडच्या मातीतून उभा राहिलेला प्रेरणादायी प्रवास

 

कुणाल शेलार / मुरबाड : ग्रामीण भागातील विद्यार्थ्यांमध्ये आत्मविश्वास, शिस्त, धैर्य आणि स्वसंरक्षणाची भावना रुजविण्याचे कार्य जर कोणी सातत्याने आणि निस्वार्थपणे केले असेल, तर त्या व्यक्तीचे नाव म्हणजे कराटे प्रशिक्षक वसंत जमदरे. शेतकरी कुटुंबात जन्मलेल्या या कर्तृत्ववान सुपुत्राने आपल्या अथक परिश्रम, चिकाटी आणि जिद्दीच्या बळावर केवळ स्वतःचेच नव्हे, तर संपूर्ण मुरबाड तालुक्याचे नाव राज्य, देश आणि आंतरराष्ट्रीय स्तरावर अभिमानाने पोहोचविले आहे.

आजवर हजारो विद्यार्थ्यांना कराटेचे प्रशिक्षण देत त्यांनी अनेक विद्यार्थ्यांना ब्लॅक बेल्ट मिळवून दिला आहे. कराटे हे केवळ खेळ नसून आत्मसंरक्षणाची आणि सशक्त व्यक्तिमत्त्व घडविण्याची कला आहे, ही भावना त्यांनी प्रत्येक विद्यार्थ्याच्या मनात रुजविली आहे. त्यांच्या प्रशिक्षणातून घडलेले विद्यार्थी आज आत्मविश्वासाने जीवनातील प्रत्येक आव्हानाला सामोरे जात आहेत.

विशेष म्हणजे, वसंत जमदरे यांनी कराटे प्रशिक्षण हा व्यवसाय न मानता समाजसेवेचा ध्यास घेतला. अत्यंत अल्प शुल्कात विद्यार्थ्यांना दर्जेदार प्रशिक्षण देत त्यांनी आर्थिकदृष्ट्या दुर्बल कुटुंबातील मुलांनाही समान संधी उपलब्ध करून दिली. अनेक गरजू विद्यार्थ्यांना विविध माध्यमांतून आर्थिक व शैक्षणिक मदत करून त्यांनी त्यांच्या स्वप्नांना नवी दिशा दिली. त्यामुळे अनेक गरीब विद्यार्थ्यांच्या आयुष्यात त्यांनी आशेचा किरण निर्माण केला आहे.

त्यांच्या मार्गदर्शनाखाली प्रशिक्षण घेतलेल्या विद्यार्थ्यांनी तालुका, जिल्हा, राज्य, राष्ट्रीय तसेच आंतरराष्ट्रीय स्तरावरील विविध कराटे स्पर्धांमध्ये उल्लेखनीय यश मिळविले आहे. अनेक विद्यार्थ्यांनी सुवर्ण, रौप्य आणि कांस्य पदकांवर आपले नाव कोरले असून, ग्रामीण भागातील विद्यार्थ्यांमध्येही अमर्याद क्षमता असते, हे त्यांनी आपल्या कामगिरीतून सिद्ध करून दाखविले आहे.ठाणे जिल्ह्यातील मुरबाडसारख्या ग्रामीण तालुक्यातून देशाच्या कानाकोपऱ्यात आणि परदेशातील स्पर्धांपर्यंत विद्यार्थ्यांना पोहोचविण्यामागे वसंत जमदरे यांची मेहनत, नियोजन आणि विद्यार्थ्यांवरील निस्सीम प्रेम आहे. त्यांनी घडविलेले अनेक विद्यार्थी आज स्वतः प्रशिक्षक म्हणून कार्यरत असून समाजात स्वसंरक्षणाची चळवळ पुढे नेत आहेत. हीच त्यांच्या कार्याची खरी पावती ठरत आहे.

आजच्या काळात मुलींच्या सुरक्षेचा प्रश्न अधिक गंभीर बनत असताना, लहान मुलींसह विद्यार्थिनींना स्वसंरक्षणाचे धडे देऊन त्यांनी समाजात सुरक्षिततेचा आणि आत्मविश्वासाचा संदेश दिला आहे. कराटेच्या माध्यमातून त्यांनी केवळ शारीरिक ताकदच नव्हे, तर मानसिक बळ, शिस्त, संयम, देशप्रेम आणि सामाजिक जबाबदारीची जाणीवही विद्यार्थ्यांमध्ये निर्माण केली आहे.यशाची शिखरे गाठूनही प्रसिद्धीपासून दूर राहणारे वसंत जमदरे हे आज मुरबाड तालुक्यासाठी प्रेरणास्थान बनले आहेत. त्यांचे कार्य हे केवळ कराटे प्रशिक्षणापुरते मर्यादित नसून, ते एक सामाजिक परिवर्तनाची चळवळ आहे. त्यांच्या अथक परिश्रमामुळे मुरबाड तालुक्याचे नाव राष्ट्रीय आणि आंतरराष्ट्रीय स्तरावर गौरवाने उच्चारले जात आहे.

शेतकऱ्याच्या घरातून उभा राहिलेला हा कराटे गुरु आज हजारो विद्यार्थ्यांच्या यशामागील खरा शिल्पकार ठरला आहे. अशा कार्यकर्तृत्ववान व्यक्तिमत्त्वाचा मुरबाड तालुक्याला अभिमान आहे आणि त्यांच्या कार्याला भविष्यातही अधिक व्यापक यश लाभो, हीच सर्वांची अपेक्षा आहे.