जलजीवन मिशनचा ‘आक्का’ मयूरचा तालुक्यात हैदोस;राज्याच्या मुख्यमंत्री-उपमुख्यमंत्र्यांचा "आका" मयूर नामकवर वरदहस्त ?

गौरव शेलार / मुरबाड : जलजीवन मिशन ही केंद्र व राज्य शासनाची महत्त्वाकांक्षी योजना ग्रामीण भागातील प्रत्येक घरापर्यंत शुद्ध पिण्याचे पाणी पोहोचवण्यासाठी राबविण्यात आली. मात्र काही ठिकाणी हीच योजना जनतेसाठी वरदान ठरण्याऐवजी भ्रष्टाचार, निकृष्ट कामे आणि अपूर्ण प्रकल्पांमुळे डोकेदुखी ठरत असल्याची भावना नागरिकांमध्ये निर्माण झाली आहे.

मुरबाड तालुक्यातही जलजीवन मिशनच्या कामांबाबत सातत्याने प्रश्न उपस्थित होत आहेत. अनेक गावांमध्ये पाइपलाइन टाकूनही पाणी नाही, काही ठिकाणी कामे अपूर्ण अवस्थेत आहेत, तर काही ठिकाणी दर्जाबाबत गंभीर तक्रारी पुढे येत आहेत. यामागे नेमके कोण जबाबदार, याची निष्पक्ष चौकशी होणे ही काळाची गरज आहे.

तालुक्यातील असोसे आसोळे येथील ठेकेदार "आक्का मयूर" म्हणून ओळखल्या जाणाऱ्या व्यक्तीच्या नावाची चर्चा अनेक कामांच्या संदर्भात होत असल्याचे बोलले जाते. मात्र केवळ चर्चांवर नव्हे, तर पुराव्यांवर आधारित चौकशी करून सत्य जनतेसमोर आणणे ही प्रशासनाची जबाबदारी आहे. जर कोणत्याही व्यक्तीने किंवा कंत्राटदाराने नियमबाह्य पद्धतीने कामे केली असतील, निधीचा गैरवापर केला असेल किंवा शासनाची फसवणूक केली असेल, तर त्याच्यावर कठोर कारवाई होणे आवश्यक आहे. आणि आरोप निराधार असतील, तर तेही स्पष्टपणे जाहीर केले गेले पाहिजे.

कोट्यवधी रुपयांचा सार्वजनिक निधी खर्च होऊनही नागरिकांना अपेक्षित सुविधा मिळत नसतील, तर लोकांच्या मनात संशय निर्माण होणे स्वाभाविक आहे. अशा वेळी संबंधित अधिकारी, अभियंते आणि यंत्रणांनी मौन बाळगण्याऐवजी पारदर्शक भूमिका घेऊन प्रत्येक कामाचा लेखाजोखा सार्वजनिक करणे गरजेचे आहे.

जलजीवन मिशन हे कोणत्याही व्यक्तीचे किंवा कंत्राटदाराचे खासगी साम्राज्य नसून ते जनतेच्या करातून उभारलेले सार्वजनिक अभियान आहे. त्यामुळे या योजनेत झालेल्या प्रत्येक रुपयाचा हिशेब जनतेला मिळायलाच हवा. दोषींना संरक्षण आणि प्रामाणिक अधिकाऱ्यांना दुय्यम वागणूक अशी परिस्थिती लोकशाहीसाठी घातक ठरू शकते.

मुरबाड तालुक्यातील नागरिकांना आज एकच अपेक्षा आहे.राजकारण बाजूला ठेवून वस्तुस्थिती समोर आणा, दोषींवर कठोर कारवाई करा आणि जलजीवन मिशनचा मूळ उद्देश पूर्ण करा. कारण पाणी हा नागरिकांचा मूलभूत अधिकार आहे; तो कोणाच्याही मनमानीचा विषय होऊ शकत नाही.