खेळाडूंच्या मैदानाला मिळणार सुरक्षा कवच; आमदार किसन कथोरेंच्या माध्यमातून २ कोटी ४८ लाखांचा निधी!

 

गौरव शेलार / मुरबाड : मुरबाड तालुक्यातील सरळगाव येथे मुरबाड तालुका क्रीडा संकुलाच्या मैदानाला संरक्षण भिंत बांधण्याच्या कामाचे भूमिपूजन आज संपन्न झाले. या कामासाठी आमदार किसन कथोरे यांच्या माध्यमातून तब्बल २ कोटी ४८ लाख रुपयांचा निधी उपलब्ध करून देण्यात आला आहे. या संरक्षण भिंतीमुळे क्रीडा संकुलाच्या मैदानाचे संरक्षण होण्यास मदत होणार असून, ग्रामीण भागातील खेळाडूंना सुरक्षित क्रीडा सुविधा उपलब्ध करून देण्याच्या दृष्टीने हे काम महत्त्वपूर्ण ठरणार आहे.

ग्रामीण भागातील अनेक खेळाडूंमध्ये उत्तम क्रीडा कौशल्य असते; मात्र त्यांना योग्य सुविधा आणि सरावासाठी सुरक्षित मैदान उपलब्ध होणे आवश्यक असते. ही बाब लक्षात घेऊन मुरबाड तालुका क्रीडा संकुलाच्या विकासासाठी संरक्षण भिंतीचे काम हाती घेण्यात आले आहे. या सुविधेमुळे मैदानाची सुरक्षितता वाढण्यास मदत होणार असून, स्थानिक खेळाडूंना आपल्या क्रीडा कौशल्याला अधिक वाव मिळण्याची अपेक्षा आहे.

यावेळी आमदार किसन कथोरे यांनी ग्रामीण भागातील खेळाडूंना चांगल्या क्रीडा सुविधा उपलब्ध करून देणे आणि स्थानिक स्तरावर क्रीडा क्षेत्राचा विकास करणे आवश्यक असल्याचे सांगितले. मुरबाड तालुका क्रीडा संकुलाच्या विकासाच्या दृष्टीने संरक्षण भिंतीचे हे काम महत्त्वपूर्ण ठरणार असल्याचेही त्यांनी नमूद केले. २ कोटी ४८ लाख रुपयांच्या निधीतून उभारण्यात येणारी ही संरक्षण भिंत मुरबाड तालुका क्रीडा संकुलाच्या विकासाला चालना देणारी ठरणार असून, ग्रामीण भागातील खेळाडूंना अधिक सुरक्षित आणि चांगल्या क्रीडा वातावरणाची उपलब्धता करून देण्याच्या दृष्टीने या कामाकडे पाहिले जात आहे.

या भूमिपूजनप्रसंगी मुरबाडचे तहसीलदार अभिजीत देशमुख, जिल्हा परिषदेचे माजी उपाध्यक्ष सुभाषदादा पवार, अनिल घरत, मोहन भावार्थे यांच्यासह विविध पदाधिकारी, कार्यकर्ते आणि ग्रामस्थ उपस्थित होते.