मुरबाडमध्ये UPSC-MPSC मोफत प्रशिक्षण केंद्राचे 18 ऑक्टोबर रोजी उदघाटन सोहळा ; IRS अधिकारी समीर वानखेडे यांची प्रमुख उपस्थिती

कुणाल शेलार / मुरबाड : ग्रामीण भागातील गुणवंत विद्यार्थ्यांना स्पर्धा परीक्षांच्या माध्यमातून प्रशासकीय सेवेत पोहोचण्याची संधी मिळावी, आर्थिक परिस्थितीमुळे कोणत्याही विद्यार्थ्याचे अधिकारी होण्याचे स्वप्न अपूर्ण राहू नये आणि तरुणाईला उज्ज्वल भविष्याची दिशा मिळावी,या उद्देशाने मुरबाड तालुक्यात महत्त्वपूर्ण शैक्षणिक उपक्रमाचे आयोजन करण्यात आले आहे.महाराष्ट्राचे लाडके व मुरबाड विधानसभेचे कार्यसम्राट आमदार किसन कथोरे साहेब यांच्या वाढदिवसानिमित्त देवा ग्रुप फाउंडेशन (भारत) व अस्मिता फाउंडेशन (महाराष्ट्र राज्य) यांच्या संयुक्त विद्यमाने MPSC व UPSC परीक्षांसाठी मोफत प्रशिक्षण तसेच प्रशिक्षण केंद्र व वसतिगृहाचा शुभारंभ करण्यात येणार आहे. रविवार,दिनांक १८ ऑक्टोबर २०२६ रोजी सकाळी १० वाजता हा कार्यक्रम किशोर,घोरले रोड,ता.मुरबाड,जि.ठाणे येथे आयोजित करण्यात आला आहे.

या कार्यक्रमाचे उद्घाटन कार्यसम्राट आमदार किसन कथोरे यांच्या शुभहस्ते होणार असून प्रमुख उपस्थिती व मार्गदर्शनासाठी IRS अधिकारी समीर ज्ञानेश्वर वानखेडे उपस्थित राहणार आहेत. त्यांच्या उपस्थितीमुळे प्रशासकीय सेवेत जाण्याचे स्वप्न पाहणाऱ्या विद्यार्थ्यांना प्रेरणा मिळण्याची अपेक्षा आहे.

केंद्रीय लोकसेवा आयोगाची (UPSC) नागरी सेवा परीक्षा आणि महाराष्ट्र लोकसेवा आयोगाची (MPSC) विविध स्पर्धा परीक्षा या देशाच्या व राज्याच्या प्रशासनात कार्य करण्याची महत्त्वपूर्ण संधी उपलब्ध करून देतात. भारतीय प्रशासकीय सेवा (IAS), भारतीय पोलीस सेवा (IPS), भारतीय परराष्ट्र सेवा (IFS) यांसारख्या केंद्रीय सेवांबरोबरच राज्यातील विविध प्रशासकीय व राजपत्रित पदांपर्यंत पोहोचण्यासाठी विद्यार्थी या परीक्षांची तयारी करतात. मात्र, योग्य मार्गदर्शनाचा अभाव, अभ्यास साहित्याचा खर्च, शहरांमध्ये राहण्याचा खर्च आणि स्पर्धा परीक्षांविषयी पुरेशी माहिती नसणे, यामुळे ग्रामीण भागातील अनेक विद्यार्थ्यांना अडचणींचा सामना करावा लागतो.अशा परिस्थितीत मुरबाडमध्ये सुरू होणारा मोफत प्रशिक्षणाचा उपक्रम ग्रामीण विद्यार्थ्यांसाठी आशेचा किरण ठरू शकतो. योग्य नियोजन, सातत्यपूर्ण अभ्यास आणि अनुभवी मार्गदर्शन यांच्या मदतीने विद्यार्थ्यांना स्पर्धा परीक्षांच्या तयारीची भक्कम पायाभरणी करता येणार आहे.मुरबाड, शहापूर आणि परिसरातील विद्यार्थ्यांमध्ये गुणवत्ता व जिद्द असूनही अनेकदा योग्य मार्गदर्शन आणि अभ्यासासाठी पोषक वातावरणाची कमतरता जाणवते. 

मोफत प्रशिक्षण केंद्र आणि वसतिगृहाच्या माध्यमातून विद्यार्थ्यांना अभ्यासासाठी अनुकूल वातावरण उपलब्ध होण्यास मदत होऊ शकते. विशेषतः आर्थिकदृष्ट्या दुर्बल कुटुंबांतील विद्यार्थ्यांसाठी असा उपक्रम महत्त्वपूर्ण ठरू शकतो.“परिस्थिती कितीही कठीण असली, तरी योग्य दिशा, कठोर परिश्रम आणि सातत्याच्या जोरावर यशाचा मार्ग गाठता येतो,” हा संदेश या उपक्रमाच्या माध्यमातून विद्यार्थ्यांपर्यंत पोहोचविण्याचा प्रयत्न आहे. प्रशासकीय सेवेत प्रवेश करणे म्हणजे केवळ प्रतिष्ठेचे पद मिळविणे नव्हे, तर सामान्य नागरिकांच्या समस्या समजून घेऊन समाजाच्या विकासासाठी काम करण्याची संधी प्राप्त करणे होय.

स्पर्धा परीक्षांची तयारी करू इच्छिणाऱ्या विद्यार्थ्यांनी व पालकांनी या उपक्रमाची माहिती घ्यावी आणि अधिकृत प्रवेश प्रक्रिया, प्रशिक्षणाचे स्वरूप,वसतिगृहाच्या सुविधा व पात्रतेच्या अटी याबाबत माहिती प्राप्त करावी, असे आवाहन देवा ग्रुप फाउंडेशनचे अध्यक्ष सुजित किसन ढोले,देवा ग्रुप फाउंडेशनचे सचिव तानाजी सदाम मोरे आणि अस्मिता फाउंडेशनचे अध्यक्ष शशिकांत पंजाराम बोरसे यांनी केले आहे.अधिकारी होण्याचे स्वप्न पाहणाऱ्या मुरबाडच्या तरुणाईसाठी हा उपक्रम केवळ प्रशिक्षणाची सुरुवात नसून, ज्ञान, जिद्द आणि समाजसेवेच्या दिशेने टाकलेले एक महत्त्वाचे पाऊल आहे असे नागरिकांमध्ये बोलले जात आहे.